Munaðarleysingjarnir og áhugamálið

Ég fékk að vöggugjöf einkennilega sérkennilegt áhugamál. Ekki hentaði það mér að læra að spila golf; ekki kveikir lostann að bruna niður snæviþaktar brekkur á svigskíðum eða vaða upp í mitti og veiða Lax. Ég aftur innviklaðist í það skemmtilega en stórfurðulega hobby að rækta ketti !!!

Til hvers að rækta ketti gæti maður spurt sig - Eins og það sé ekki nú þegar offramboð af þessum vilidýrum sem læðast um götur borga og sveita, eyða villtu dýralífi, sniglast um hús nágranna sinna að næturlagi bara til að gera óskunda. Mæta svo heim til eiganda sinna sakleysið uppmálað og hreiðra um sig í besta hásætinu og líða makindalega út af eftir veisluborð dagsins.

Hver sem ástæðan er á bak við þetta áhugamál þá kolféll ég fyrir því að rækta ketti  Fyrir utan það að hafa mikið dálæti á þessum elskum þá að sjálfsögðu fylgir það staðalímyndinni að safna köttum þegar maður er einhleyp kona á miðjum þrítugsaldri. Svo ég auðvitað fyllti húsið af köttum ... Flestir kettirnir mínir eru norskir skógarkettir. Dásamlegir kettir !!!! síðan auðvitað til að hafa smá fjölbreytni á ég einn húskött af þeirri gerð sem ég lýsti hér að ofan. Hún er samt indæl og afskaplega prúð heima hjá sér þó eflaust hún breytist í villt flökkudýr í eftirlitsferðum sínum í hverfinu.

Þrátt fyrir að hafa meiri reglu og strangara uppeldi á hreinræktuðu köttunum mínum þá eru þeir slungnir að finna sér hinar ýmsu útgönguleiðir og sleppa af og til út á vit frelsisins. Í einu slíku tilfelli var ég með aðra nosku læðuna mína í breimi og beið spennt eftir að hún fengi að hitta tengdasoninn sem ég hafði miklar væntingar til. Stelpuskjátan sá við heimilisfólkinu og slapp út með klókindum og hélt sína leið. Í öngum mínum reyndi ég að fanga hana ... hlaupandi á sokkaleystum milli garða og grindverka, æpandi, veinandi og kjökrandi án þess að læðuskjátan skeytti nokkru um kveinin. Upp á þak kom hún sér og horfði niður til mín glaðhlakkandi  ... Eftir 9 vikur varð ég svo að gjöra svo vel að taka á móti óskilgetnu munaðarleysingjunum og hjálpa til við uppeldið.

Nú er ég búin með mina pligt, mamman farin að vilja losna undan ábyrgðinni meðan ég sit enn uppi með tvo munaðarleysingja. Ég hef verið að reyna að fá gott heimili fyrir þessi kríli svo fljótlega fari að létta á kattarhaldinu á heimilinu því svo fæddust hinni ræktunarlæðunni minni fjórir gríslingar sem von bráðar verða farnir að vera í slagtogi með þeim eldri og guð hjálpi mér ef ég enn verð með húsið fullt af villingum. 

Það er dáltið öðruvísi að ala upp húskettina mína en hreinræktuðu kettlingana. Það kemur svo greinilega fram í norsku köttunum sá karakter sem einkennir þá tegund. Knoll og Tott sem komu óskilgetin og undan sérvitrum fjósaketti blandast dáltið undarlega með norska skógarkettinum. Bæði útlit og karaktereinkenni minna og minna ekki á norska skógarköttinn því þeir eru hreint ekki eins og venjulegir húskettir heldur.

Þeir virka til að mynda ekki mjög aðlaðandi og krúttlegir við fyrstu sýn. Aftur nú þegar ég er farin að kynnast þeim betur þá leynist í þeim mikið sharmatröll. Þess vegna vona ég að ég detti niður á gott heimili handa þeim ...Því ef þeir daga uppi hjá mér veit ég að nágrannar mínir fara að huga að því að senda heilbrigðiseftirlitið á staðinn. Núþegar heldur fólk að ég sé rugluð og í hvert skipti sem ég ramba í fangið á fólki hér um slóðir spyr það mig með meðaumkunnarsvip "hvað áttu eiginlega marga ketti núna ??"  Hingað til hef ég furðað mig á þessum spurningum þar sem ég er nú ekki að bæta við köttum vikulega en ... ég hálf kvíði fyrir því að viðurkenna að tveir hafi bæst við síðan ég var spurð síðast.

Er á meðan er og góð mamma sér um sína þar til aðrir staðgenglar gefa sig fram...Aftur er ég mjög spennt yfir norska gotinu mínu og þótt mörgum finnist skrítið að sumir vilji kaupa ketti á tugi þúsunda þá hefur gengið mjög vel að finna hreinræktuðum gotum góða umönnunaraðila. Norsku skógarkettlingarnir eru vinsæl tegund og oftar en ekki hafa verið biðlistar hjá ræktendum þegar framboðið er lítið. Skógarkattarræktendur hafa líka tekið höndum saman í ræktun og kynningu á tegundinni og er opin heimasíða á skogarkettir.is þar sem er að finna mjög góða kynningu á skógarkettinum.